රැයේ වට වැසි උරණ වී
තෙමූ වැහි බිඳු බර වැඩී
පෙති ළිහී ගිලිහෙන්න පළමුව
දෙන්න අවසර නික්මෙමී
දෑල ඉර හඳ හිම් නැතී
සිසිල් සෙනෙහැති සෙවනකී
විඩා නිම වූ ගමන කෙළවර
එන්න සතුටින් පිළිගමී
බැඳී විඳි පෙම් සුවඳැතී
අත් නොහැර සිත පැතුම වී
දිනෙක මතුදා එන්න සකිසඳ
පුදමි සෙනෙහස අරුමැතී
පද රචනය - : KRK මුණසිංහ
සංගීතය -: දර්ශන වික්‍රමතුංග
ගායනය -: පවරි අමරසා
ගීතය අමුතුය.....සියුමැලිය....මනරම්ය....විටෙක හද පාරමින් තෙත් කරමින් ඇමිණූ වාගාලාපයක් සංගීත රස උද්දීපනය තුලින් හඬක් තුලින් ජන මන කළඹවන්නේ නිතැතින්ම රසික හදවත් තුලට සියුම් රිදුමක් එක් කරමිනි. රසිකයාට කියන්නට ඇත්තේ "එ්කනම් මාරයි"කියා පමණය.
මේ ගීය පොඩි සාදුගේ රසික හදවත නැවත නැවතත් පහුරු ගෑවා යයි කීවොත් මා වඩාත් නිවැරදිය. රචිකාවිය kRk මුණසිංහ නමැතත්තියයි.සළ රූපයකින් පෙන්නනවාට වැඩි කොටසක් අෑ අකුරු කොට ඇත්තේ මහත් වූ සතත්භ්‍යසයක උච්ඡතම අවස්ථාවක් රසිකයා වෙත දායාද කරලමිනි.
විරහ වේදනාවක් මේ තරම් රසවත්නම් මීවිතනම් කුමටදැයි මා ජනතාවගෙන් අසමි.මේ තරම් කටෝර අද්දෑකීමක්, කාන්තාවකගේ අපරිමිත සිතිවිලි දහරාවක් දියාරු වී හුණු වී යන අවස්ථාවකි ප්‍රේමයේ බිඳ වැටුම.සමහර විට එය වැඩි පුරම දැනෙන්නේ ආසියාතික කාන්තාවටය.ඒ ආසියාතික කාන්තාව හැමදාමත් රිදුම් පිරිමදිමින් තෙල් උලමින් සිටිනවා මිසක ඒවා වෙනුවෙන් නැගී හිටින අවස්ථා ඉතා අඩු නිසාවෙනි.නමුදු මෙවැනි අවස්ථාවක් ඉතා රසවත්ව මනා සංයමකින් පෙන්වීමට අප හදුන්වන්නේ නිර්මාණාත්මක බව කියායි.
රැයේ වට වැසි උරණ වී
තෙමූ වැහි බිඳු බර වැඩී
පෙති ළිහී ගිලිහෙන්න පළමුව
දෙන්න අවසර නික්මෙමී
ගීතය ගෙතෙන්නේ අඹු සැමි යුවලක් චිත්ත සන්ථානය අභිමුව රූපණය කරමිනි.රචිකාවියගේ දක්ෂතාවයද එයමය.මේ රචනාවන මටනම් ඉතාමත් සජීවීයැයි කිවහොත් මා වචා නිවැරදි වනු ඇත.නමුත් මෙය දෙවිදියකට අර්ථ නිරූපණය කල හැකිය.ඒ දෙවිදියම කෙසේ උවත් මා මගේත් ඔබේත් පහසුව තකාත් එක් පැත්තක් පමණක් සටහන් කරමි
එක් විදියකින් ගත් කල අඹුසැමි කළහයකි.ඇය එය පෙන්වා දෙන්නේ."රැයේ වට වැසි උරණවී"යනුවෙනි.මේ රන්ඩු සරුවල් කෙතරම් සිදු වූවත් අවසානය වන්නේ කාන්තාවගේ සිත තැලී පෙලී යාමයි.ඒ අවසාන අවස්ථාව දරා ගන්නා කාන්තාව තව දුරටත් තම සැමියා හා රැදී ඉන්නවාද එහෙම නැතිනම් දමා හැර යනවාදැයි තීරණයකට එළැඹෙයි.එය සිදු වන්නේ තමන්ගේ අඩුපාඩුව කිරා මැන බැලීමෙන් පසුවය.තමාට අවාසියකින් තොර වන ලෙසය.ඇය අවසන තම තීරණයට එළැඹෙයි.ඇය එම තීරණයට එන්නේ පොඩි සාදු උඩ කීවා සේම තම වාසියත් අඩුපාඩුත් සලකාගෙනය."තෙමූ වැහි බිදු බර වැඩී" යන්නෙන් එය වඩාත් පැහැදිලිවේ.එනම් තමාට වඩා සැමියාගේ දොසක් දක්නට ඇති බවයි ඇය එය කියා පාමින් උධෘත පාඨ කර ගනිමින් " පෙති ලිහී ගිලිහී යන්න පලමුව- දෙන්න අවසර නික්මෙමී" යනුවෙන් සැමියාගෙන් ඉවත් වීමට අවස්ථාවක් ඉල්ලයි. මේ පෙන්වා දෙන්නේ කාන්තාවකගේ සදාතනික අසරණ බවයි.කාන්තාවක් කෙතරම්නම් සිය කුටුම්භය තුල අණසක පතුරුවා සිටියත් කළකෝලාහලයකදී පරාජිතයි යන්න මොනවට පැහැදිලි කර දෙන්නකි මේ පද රචනය.එය ඉල්වන විදිය ලාලිත්‍යකින් පැවසීම නිර්මාණ කරුවගේ හැකියාව මත තීරණය කරන්නකි.රචිකාවිය තම නිර්මාණ හැකියාව ඉතාමත් හොදාකාරවම පෙන්වන අවස්ථාවකි '""මේ පරිපූර්ණ ගේය පද රචනය"""
දෑල ඉර හඳ හිම් නැතී
සිසිල් සෙනෙහැති සෙවනකී
විඩා නිම වූ ගමන කෙළවර
එන්න සතුටින් පිළිගමී
" වැරදි හදාගෙන නුඹ නැවත එන්න.නැවත මම ඔබව පිලිගන්නම් " යනුවෙන් ඇය පවසයි. පසුගිය දා මුහුණු පොතෙහි ඉතා රසවත් කෙටි කවියක් දින කිහිපයක් තුල සංසරණය විය.ඒ " වර්ණ රසිකා" නැමැත්තිය ලියන "ආදරේ යනු යන්ට දීමය ආය ආවෙත් ඉන්ට දීමය" යන කවියයි.මේ පද පිංචයද එයට වඩාත් ලගයි කීවොත් මා නිවැරදිය.නමුත් මේ පද රචනාවකම් කෙටි කවියක් තරමටම රසවත් නැත.
දෑල හද හිම් නැතී-සිහිල් සෙනෙහැති හෙවනකී"ඇය ඉල්ලන්නේ මෙවන් හෙවනකී.සැමියකුගෙන් බිරියක් බලාපොරොත්තු වන රසය සැනසීම මෙයයි. ඒ සිසිල් වූ ස්නේහය පුද කරනවානම් පවුල් ජීවිතයක් කෙතරම්නම් රසවත් වේවිද..?
"විඩා නිම වූ ගමන කෙළවර
එන්න සතුටින් පිළිගමී"
මේ සැමියා යන විඩා සහිත වූ ගමන තුල තමාගේ විඩාව නිවුනු පසු එන්න යනුවෙන් ඇය පවසයි.මෙහි යම් දාර්ශනික තැනක්ද පෙනේ. බුදු දහම පිලිබඳව ලෞකික දර්ශනයක් පෙන්වා දෙන පැරණි නිර්මාණ කරුවන් තම දර්ශනය මෙසේ පෙන්වා දෙයි" කාමය වඩාත් කාමුකව ගත කිරීමෙන්ද කාමය දුරස් කල හැකිය" යනුවෙනි.එය මෙහිදී රචිකාවිය දැන හෝ නොදැන ඒ දර්ශනය තම නිර්මාණයට ඈදා ගන්නා බව මගේ මතයයි. සමහර විටෙක බිරිද පවසන්නේ මෙලෙස විය යුතුය." නුඹ බොහෝ කාලයක් තවත් මේ වැනි දුශ්ඨකම්,කලකෝලාහල කරමින්ම කල් ගෙවා ඇති වූ පසු නැවත හොද ස්වාමි පුරුෂයෙකු වී එන්න
"කෙසේ වූවද මේනම් ඉතා මනරම් ලෙස පද රචනය කෙරූවකි.
බැඳී විඳි පෙම් සුවඳැතී
අත් නොහැර සිත පැතුම වී
දිනෙක මතුදා එන්න සකිසඳ
පුදමි සෙනෙහස අරුමැතී
කිසි විටෙක හැර නොයෑම බිරිදකගේ වූවද යහපත් පෙම්වතියකගේ වූවද විශේෂ ලක්ෂණයකි.ඒ බව මනාව පෙන්වා දෙන්නකි ගීතයේ අවසාන කොටස.
ඇය නැවත නැවතත් කියන්නේ හොඳ සැමියෙකු වී එන ලෙසයි. බැඳී විදි පෙම් සුවඳැතී - අත් නොහැර සිත පැතුම වී.පසු කල ගෙවූ සුවදැති පෙම් පැතුම් සිතේ ගුලි කරවාගෙන නැවත තමා කරා එන ලෙසත්.එසේ ආවොත් ඇය තුල ඇති ආලය පුදමි යනුවෙන් පවසයි
" දිනෙක මතුදා එන්න සකිසඳ
පුදමි සෙනෙහස අරුමැතී "
මේ ගීතයේ රසවත් බව වන්නේ මනා වූ සංයමයයි.තම වේදනාව රිදුම හදවත තුල දරාගනිමින් තම විරහව වෙනුවට තව දුරටත් අාදරය පාමින් සෙනෙහසම ඉල්ලන අයුරු ඉතාමත් රසවත්ය.මනා පරිකල්පනයත් ප්‍රතිභාවත් මුල් කරගනිමින් රචිකාවියගේ මේ වියමනනම්..අපූරුය. මේ සඳහා සංගීතය තනු නිර්මාණය සිදු කරන්නේ "දර්ශන වික්‍රමතුංග"ය.ඔහුද මනා පරිචයක් ඇති රසික හදවත් කම්පිත කරවන ප්‍රතිභාවකින් යුත් සංගීතවේදියෙකි.පද රචනයට වඩාත් සාධාරණය ඉටු කරමින් ගයන "පවරි අමරසා" ගයන මෙය නම් අපූරුය.
ගුරුගොඩ සිරිවිමල
No comments:
Post a Comment